茅夫滅“魔”有機

紅魔曼聯認真失威，英超第一炮做咗濕水炮仗，只能一比一迫和紐卡素，四大天王之中率先失分，老貓燒鬚的“費蛇”當然“火都嚟埋”，今晚第二擊作客樸茨茅夫誓要打開勝利之門，不過，唔係話贏就一定會贏，季前社區盾曼聯都只係憑“射十二碼”贏對手樸茨茅夫，今仗踢作客更加冇着數，初盤仲要讓半球/一球，必向大家推介樸茨茅夫。

“老樸”首仗慘遭車仔重創，球員士氣唔多唔少受到打擊，但今晚自己地頭出擊，有一班鄉親父老支持，點都打出加一波，而且亦要報回社區盾一敗之仇，作戰鬥心亦會大大提升，只要踢出上季的拼勁及鬥志，根本未驚過曼聯，一於主場除魔斬妖。

又有傷兵又有停賽，“費蛇”的確幾頭痛，中場更加兵源不足，C朗、傑斯、卡域克、朴智星及蘭尼等都不能上陣，攻守均失去平衡，雖然今晚有迪維斯及安達臣歸隊，但舟車勞頓，比賽動力自然大減，發揮一定受到影響，作客對住硬橋硬馬的“老樸”，再一次失分絕不出奇。

推介：樸茨茅夫 1:0