| 卡塔爾主帥畀老上司恰住 |
| http://www.22878.com 2007-07-09 太阳报 |
| 责任编辑： |
| 亞洲盃今日輪到卫冕冠軍日本出場，喺越南河內接受卡塔爾挑戰。力奇對日本旗開得勝較有信心，事關無論人腳、備戰工夫同熱身賽成績，日本都係高出唔止一籌。更重要係，卡塔爾領隊梅蘇域以前只不過係日本領隊奧禪助手跟班，有幾多料，奧禪都一清二楚，捧主勝有數！（now685台、泰星U40台及中央5台周一晚6:20直播） 日本領隊奧禪係波斯尼亞人，梅蘇域就係佢同鄉，佢兩個曾經喺九○世盃聯手帶領南斯拉夫出征，當時奧禪係領隊弗人，梅蘇域只係佢助手，好話唔好聽，梅蘇域只係跟佢搵食，難怪近排都有消息，問奧禪會唔會搵番梅蘇域去日本幫手。簡單哋講，梅蘇域有咩伎倆，都唔會逃得過奧禪法眼。 冇錯，奧禪喺今屆賽事備戰階段先後多次表達不滿，既話日本足總唔識做，唔暫停聯賽等佢班球員專心準備亞洲盃，又話河內天氣唔好，溫度高兼濕度高，球員踢得好辛苦，不過咁樣並唔代表奧禪會坐以待斃。 卡塔爾玩神秘累死自己 首先，日本大軍周四已經抵達河內，仲同當地乙組球會踢咗場熱身賽大勝三比○，目的係等班球員適應天氣同雨戰情況；其次，佢亦都一早睇番卡塔爾嘅比賽錄影帶，務求做到知己知彼。 另邊廂嘅卡塔爾，實力唔及日本反而玩神秘，先後兩次更改日期，搞到上周五先到，適應時間已經有限。抵之後竟然又取消首課操練，試問一支西亞球隊係咪真係咁易適應到南亞潮濕天氣先？ 再者，卡塔爾個熱身賽成績真係衰到嚇死你，單計今年踢咗七場只係贏得一場，上星期對住泰國都話吞兩蛋，陣中後防兩大主力拉查比同艾巴歷又因為紀律問題，今仗齊齊被罰停賽。飛主力只係踢過曼城嘅翼鋒耶沙同烏拉圭裔前鋒沙巴斯坦，相比起日本有高原直泰同中村俊輔擔大旗，真係輸蝕好多。 |
| 进入火爆视频直播聊天室欢迎激情讨论 | ［所有评论］ ［火爆论坛］ | ||
|
|||
